Iai temanna te passenger are e roko nte kiba nte kaabong ae nako aio ae e tararuaaki n katukaki n ana auti as a Person Under investigation (PUI) imwiin ana riiboti nakon te onaoraki I Naverevere bwa e reke irouna te bekobeko.
Teuaio bon kain te aba ae PNG are e oki mai mwiin kawaina mai Fiji ao Australia nte kaabong nte week aio. E tiku I fiji man te 29 n Beberuare imwiin kawaran Australia ao man tikunako I Fiji ni uaa ae e oki nte kiba are nte kaabong.
E roko teuaio nte onaoraki I Naverevere ngke e reke irouna te bekobeko ike e kaota iai raraomana kioina ngkai e oki mai Fiji are e tibwa tia n kamatoaaki bwa iai temanna te confirmed imported case ma iai.
Ena tararuaki teuaio ma kainnabana n ana auti.
Ae kabwaninaki rongorongon te bwatintia aio ao ana rimwiiaki naake a tia n reitaki ma ngaia inanon ana tai n kiba n oki mai Fiji ao n ana tai n tiku n mwengana.
E kakoaua te Botaki ibukin te Mauri bwa e ti reke nte tai aio te bekobeko ao akea riki kanikinaan te Aoraki ae te covid19 iroun teuaio, ao ngkai e kitana Fiji imwiin te tai are ea kuneaki iai te confirmed case, e rangi n uarereke aron reken te aoraki aio irouna. Ma e ngae n anne ao ena bon teimatoa te Botaki ibukin te mauri n katikua I bon irouna ke n self- quarantine ao n tararuaia man ana auti ma kainnabana.
Te kauring man te botaki ibukin te mauri bwa ena kateimatoaki kauarerekean te nakonako ao te bobotaki ao riki te tararua ibukin marurungiia man kateimatoa te kaitiaki ao te tebo bai ma te ran ae e itiaki ao te tobu n katoa tai.
